खानेपानीमन्त्री यादव नागरिक स्तरबाट सम्मानित

कार्यक्रमलाई सम्बोधन गर्दै मन्त्री यादवले काठमाडौं उपत्यकावासीका लागि बाह्रै महिना शुद्ध र स्वच्छ पानी उपलब्ध गराउन आफू पूर्ण प्रतिबद्ध रहेको बताउनुभयो। मन्त्री यादवले काठमाडौं उपत्यकामा खानेपानीको समस्यालाई अल्पकालीन र दीर्घकालीन रूपमा समाधान गर्न सरकारले ठोस कदम चालिरहेको बताउनुभयो। ‘मानिसलाई पानी नभइ नहुने चिज हो, पानी बिना बाच्न सकिँदैन, काठमाडौं उपत्यकाको खानेपानी समस्या समाधानका लागि ठोस कदम चाल्छौँ’ उहाँले भन्नुभयो।

काठमाडौं उपत्यकामा हेलम्बुवासी, नागरिक समाज एवं जनप्रतिनिधिहरूको साथ र सहयोगका कारण यसवर्ष समयमै मेलम्चीको पानी ल्याउन सफल भएको बताउनु हुँदै उहाँले सम्पूर्ण मेलम्चीवासीलाई धन्यवाद समेत व्यक्त गर्नुभयो। उपत्यकावासीहरूको साथ र सहयोगमा पानीको समस्या समाधान गर्न सकिने समेत मन्त्री यादवले बताउनुभयो।

इतिहासमै पहिलो पटक वर्षायामपछि समयमै मेलम्चीको पानी काठमाडौं उपत्यकामा ल्याउन आफ्नो प्रयास सफल भएको बताउँदै मन्त्री यादवले समितिले गरेको सम्मानले आफूलाई गर्व र थप काम गर्न प्रेरणा मिलेको बताउनुभयो।

उहाँले भन्नुभयो ‘मलाई गरिएको यो सम्मानले नागरिकका अपेक्षाहरू पूरा गर्न थप ऊर्जा दिएको छ। निरन्तर गुणस्तरीय सेवा गर्दै मेलम्ची आयोजनालाई प्रभावकारी बनाउने मेरो यात्रा जारी रहनेछ। सहयोग र सुझावका लागि सबैलाई धन्यवाद छ।’

दक्षिणकालीका नागरिक, मेलम्चीवासीहरूसँग हात जोडेर आफूले काठमाडौं उपत्यकामा पानी ल्याउन सफल भएको बताउनु हुँदै मन्त्री यादवले सरकारले नागरिकका गुनासा र मागलाई सम्बोधन गर्नु पर्ने बताउनुभयो। उहाँले भन्नुभयो, ‘जलस्रोतको धनी देश नेपालमा पानीका लागि संघर्ष समिति बनाउनु पर्ने अवस्था आउनु दु:खद पूर्ण कुरा हो। नागरिकलाई के आवश्यक छ, उनीहरूका माग के हुन सरकारले पुरा गर्नु उसको दायित्व हो।’

यसैगरी मन्त्री यादवले खानेपानी मन्त्रालय नागरिकका समस्या र गुनासाहरू सम्बोधन गर्नका लागि सधैँ अग्रसर रहेको बताउनुभयो। कोटेश्वर क्षेत्रमा ओभरहेड ट्याङ्की निर्माणका लागि त्यहाँका स्थानीयवासी एवं संघर्ष समितिले राखेका मागका विषयमा मन्त्री यादवले ओभरहेड ट्याङ्की निर्माणका लागि आफूले बजेट विनियोजन गराउने प्रतिबद्धता ब्यक्त गर्नुभयो।

पेप्सीकोला, जडिबुटी क्षेत्रमा खानेपानीको पाइप यसैवर्ष बिस्तार गरिने समेत मन्त्री यादवले बताउनुभयो। उहाँले भन्नुभयो ‘पेप्सीकोला, जडिबुटी क्षेत्रमा खानेपानीको पाइप यसैवर्ष बिस्तार गर्छु, मेरो प्रतिबद्धता भयो।’ एक छुट्टै प्रसंगमा बोल्नु हुँदै मन्त्री यादवले ठेकेदारको लापरवाहीका कारण समयमै नागरिकले खानेपानीका मिटर पाउन नसकेकाले खानेपानीको मिटर समयमै नदिने ठेकेदारको म्याद नथपेको बताउनुभयो।

‘समयमै मिटर नदिने तर पटक पटक म्याद थप गरेर जनतालाई दु:ख दिने लापरवाही गर्ने ठेकेदारको मैले म्याद थपेन, अब नयाँ टेण्डर निकालेर मिटर नपाउने समस्याको अन्त गर्दैछौँ।’ उहाँले भन्नुभयो।

यसैगरी मन्त्री यादवले काठमाडौं उपत्यकामा खानेपानीको समस्या समाधानका लागि सिस्नेरीबाट पनि पानी ल्याउने पहल भइरहेको जानकारी गराउनुभयो। उहाँले भन्नुभयो ‘काठमाडौं उपत्यकामा ५१ करोड लिटर पानीको आवश्यक छ, अहिले जम्मा १७ करोड लिटर पानी वितरण गरिरहेका छौँ, हामीले थुप्रै योजना अघि सारेर यहाँको पानीको समस्या समाधान गर्नेछौँ।’