666 पटक हेरिएको जुम्ला १२ जेठ । खानेपानी अभावमा जिल्ला प्रहरी कार्यालय जुम्लाका प्रहरी खानेपानी ओसार्न बाध्य छन् । धारामा नियमित पानी नआएपछि झण्डै दुई किलोमिटर दुरीमा रहेको कर्णाली प्राविधिक शिक्षालय जुम्ला नजिक गाडीबाट पानी ओसार्नु परेको प्रहरी निरीक्षक मुकुन्द रिजालले जानकारी दिनुभयो ।
‘यो अहिलेको मात्र समस्या होइन, द्वन्द्वकालमा भत्केको जिल्ला प्रहरी कार्यालय जुम्ला पुनःनिर्माण हुँदा देखि नै खानेपानी व्यवस्थापनका लागि माग गर्दै आएपनि खानेपानीको प्रबन्ध हुन नसक्दा खानेपानीको समस्या बढेको हो’ प्रहरी निरीक्षक रिजालले बताउनुभयो ।
जिल्ला खानेपानी तथा सरसफाइ डिभिजन कार्यालयले एक क्वाइल पाइप उपलब्ध गराएपनि त्यो पर्याप्त नभएकाले कार्यालयमै थन्किएको छ ।
झण्डै २ सय जना प्रहरीको दरबन्दी रहेको जिल्ला प्रहरी कार्यालयमा पानी नहुँदा नुहाउन र सरसफाइ गर्न समेत समस्या भएको प्रहरी निरीक्षक रिजालले बताउनुभयो ।
