676 पटक हेरिएको काठमाडौ १ असार । काठमाडौको सीतापाइलामा मेलम्ची खानेपानीको पाइप बिछ्याउने क्रममा ज्यान गुमाएकाका परिवारलाई बीमा र किरिया खर्च बापत ११/११ लाख रुपैयाँ दिइने भएको छ ।
बुधबार आयोजना कार्यान्वयन निर्देशनालय, निर्माण व्यवसायी र मृतकका आफन्त बीच भएको बैठकमा निर्देशनालयका तर्फबाट प्रति मृतक पाँच लाख रुपैयाँ र निर्माण व्यवसायीका तर्फबाट छ लाख रुपैयाँ गरी र ११ लाख रुपैयाँ दिने सहमति भएको आयोजनाका प्रवक्ता लीला प्रसाद ढकालले जानकारी दिनुभयो ।
पाइप लाइन विछ्याउने क्रममा ढिस्कोले पुरिंदा सप्तरीका सन्तोष दास र श्यामसुन्दर राम तथा पर्वतका तेजप्रसाद केसीको बुधबार विहान २ बजे घटनास्थलमै ज्यान गएको थियो ।
उनीहरु तीनै जनालाई काठमाडौँ उपत्यका खानेपानी लिमिटेड, आयोजना कार्यान्वयन निर्देशनालय सँगको सम्झौता बमोजिम तेञ्जिङ रमण जोइन्ट भेन्चरले काममा लगाएका थिए ।
थोक वितरण प्रणाली अन्तर्गत तीनै जनाले सात महिनादेखि मेलम्ची खानेपानी आयोजनाको पाइप बिछ्याउने काम गर्दै आएका थिए ।
