766 पटक हेरिएको भक्तपुर : भक्तपुर भएर बग्ने हनुमन्ते नदी सफाइ अभियानको ३७औँ हप्तामा छ टन फोहोर सङ्कलन भएको छ । सूर्यविनायक नगरपालिकाको अगुवाइमा भइरहेको सफाइ अभियानका क्रममा आज भक्तपुर नगरपालिका–१ सल्लाघारीस्थित पुल क्षेत्र र खोलामा सरसफाइ गरिएको हो।
सफा, सुन्दर भनिने भक्तपुर नगरपालिका क्षेत्रमा रहेको यो पुलबाट मात्रै छ टन फोहोर सङ्कलन भएको र अझै फोहोर बाँकी रहेकाले अर्को दिन पुनः सफाइ गरिने सफाइ अभियन्ताले बताएका छन् ।
सफाइमा प्रतिनिधिसभा प्रदेशसभा सांसद सरस्वती बाटीले हनुमन्तेमा फोहोर फाल्न तथा ढल मिसाउन रोक्नुपर्ने बताउनुभयो । उहाँले भक्तपुर नगरपालिकाले यसमा अटेर गरेको, नगरको फोहोर सिधै हनुमन्तेमा मिसाएको र नदीमा फोहोर फाल्न रोक नलगाउँदा हनुमन्ते सफाइ अभियानमा चुनौती थपिएको बताउनुभयो ।
सूर्यविनायक नगरपालिकाका प्रमुख वासुदेव थापा, जिल्ला समन्वय समितिका उपप्रमुख सरिता कुँवर लगायतले हनुमन्ते नदी सबैको साझा नदी भएको बताउँदै यसको सफाइमा सबै नगरपालिकाको सहभागिता हुनुपर्ने बताउनुभयो ।
वि.सं २०७५ लाई हनुमन्ते सफाइ वर्ष घोषणा गर्दै शुरु भएको अभियानमा आज जिल्लाका विभिन्न सङ्घसंस्था, नगरपालिका, विद्यालय, स्थानीय बासिन्दा र अभियन्ता गरी २७६ जनाको सहभागिता रहेको हनुमन्ते सफाइ अभियानका अभियन्ता पुष्कर गजुरेलले जानकारी दिनुभयो ।
अभियानमा अहिलेसम्म ३१६ टन फोहोर सङ्कलन भएको उहाँले बताउनुभयो ।
