1004 पटक हेरिएको 
वीरगञ्ज : वीरगञ्ज महानगरपालिका हुँदै बग्ने सिर्सिया नदीको प्रदूषण रोक्न स्थानीय पुनः जागरुक भएका छन् । सिर्सिया नदी एवं वीरगञ्ज प्रदूषणमुक्त अभियानमा आवद्ध वीरगञ्जबासीले नदीको प्रदूषण रोक्न पुनः दबावमूलक अभियान शुरू गरेको हो ।
विगतमा विभिन्न दबावमूलक कार्यक्रम गर्दै आएको अभियान कोरोना महामारीका कारण मौन थियो। अभियान मार्फत् हस्ताक्षर संकलन, सरोकारवालालाई सिर्सिया नदीको पानी हस्तान्तरण, ज्ञापनपत्र बुझाउने, प्रदूषण गर्ने उद्योगहरू विरुद्ध मुद्दा दर्ता गर्ने, चक्काजाम, अन्तक्रिया लगायतका गतिविधि भएका थिए । नदी प्रदूषण कायम रहेकोले पुनस् अभियान मार्फत् दबावमूलक कार्यक्रम गर्न लागिएको अभियानका अभियानका सदस्य वृजेश्वर चौधरीले बताउनुभयो ।
बारा-पर्सा औद्योगिक करिडोरमा रहेका उद्योगबाट निस्कने छालाको टुक्रा, छाला धोएको केमिकलयुक्त पानी, छायी तथा महानगरपालिकाबाट निस्कने फोहोरमैला समेत सिर्सिया नदीमा हाल्ने गरिएको छ । नदी प्रदूषित भइ गन्हाउने पानी बग्ने गरेको छ । एकातिर जलचर प्राणीको बासस्थान नष्ट भएको छ भने अर्कोतिर नदी आसपासका बासिन्दा छालाको विभिन्न संक्रमण, मुटु रोगी हुनुको साथै क्यान्सरको जोखिममा छन् ।
वीरगञ्जका आम नागरिकलाई स्वच्छ तथा स्वस्थ वातावरणमा बाँच्ने अधिकार सम्बोधन गराउन पुनस् दबावमूलक अभियान आवश्यक देखिएको अभियानका संयोजक अधिवक्ता सुरेन्द्र कुर्मीले बताउनुभयो । नदी र शहरलाई प्रदूषणमुक्त बनाउन निरन्तर दवाव आवश्यक देखिएको उहाँको भनाइ छ ।
‘नदी कात्तिके र चैते छठमा मात्रै थोरै सफा हुन्छ, अन्य समयमा प्रदूषित नै छ ।’ उनले भने,‘पटक पटक सरोकारवालालाई ध्यानाकर्षण गराउँदा पनि सुनुवाई भइरहेको छैन, नदी र शहर दुवै प्रदूषणमुक्त हुनुपर्छ भन्ने हाम्रो माग हो, निरन्तर दबावमूलक अभियान सञ्चालन गर्छौ ।’
