2843 पटक हेरिएको काठमाडौ ३० फागुन । खुल्ला दिसामुक्त घोषणा भईसकेका वडा, गाउँपालिका वा नगरपालिकालाई निश्चित सूचकहरु पूरा भएपछि पूर्ण सरसफाइ घोषणा गरिन्छ । सुरक्षित चर्पीको प्रयोग, सुरक्षित पानीको प्रयोग तथा भण्डारण, साबुन पानीले हात धुने बानी तथा व्यक्तिगत सरसफाइ, सुरक्षित खानाको सेवन तथा भण्डारण, सफा घर आँगन र सफा तथा स्वच्छ वातावरण, पूर्ण सरसफाइ घोषणा गर्नु अघि हुनुपर्ने न्यूनतम आधार हो ।
पूर्ण सरसफाइ घोषणाका लागि प्रक्रियागत चरणहरुबारे हेल्भेटास जलस्रोत व्यवस्थापन कार्यक्रमका सामाजिक तथा तालिम अधिकृत निलकण्ठ पाण्डेसँग हामीले कुराकानी गरेका छौं ।
https://soundcloud.com/user-186223667/nil-kantha-pande
पूर्ण सरसफाइ अभियान अन्तर्गत शुरुमा हरेक घरमा कुन कुन सूचक पूरा भएका छन् भनेर गाविस स्तरीय खानेपानी, सरसफाई तथा स्वच्छता समन्वय समितिले अवलोकन गरी घर घरमा नीलो स्टीकर टाँस गरिन्छ ।
जहाँ पाँच वटै सूचक लेखिएको हुन्छ । सूचक पूरा गरेको आधारमा घरधनीले नै स्टीकरमा टीक लगाउने व्यवस्था मिलाएको हुन्छ र सबै सूचक पूरा गरेपछि गाविस स्तरीय खानेपानी तथा सरसफाई स्वच्छता समन्वय समिति (भीवाससीसी) ले अनुगमन गरी हरियो स्टीकर दिइन्छ ।
हरियो स्टीकर पाएको घर पूर्ण सरसफाईका लागि योग्य मानिन्छ । कुनै वडा वा वस्तीका सबै घरधुरीले हरियो स्टीकर पाएपछि मात्र त्यो गाविसको वडा वा वस्ती पूर्ण सरसफाईका लागि योग्य हुन्छ ।
त्यसपछि गाविस स्तरीय खानेपानी तथा सरसफाई स्वच्छता समन्वय समितिले प्रमाणीकरण गरेपछि मात्र वडा वा वस्तीलाई पूर्ण सरसफाई वडा, वस्ती वा पूर्ण सरसफाइ गाउँपालिका घोषणा गरिन्छ ।
