128 पटक हेरिएको 
सुर्खेत: सुर्खेतको भेरीगंगा नगरपालिका–१२ मा फोहोर प्रशोधन केन्द्र स्थापनाको काम काम अन्तिम चरणमा पुगेको छ । प्रदेश सरकार र भेरीगंगा नगरपालिकाको आर्थिक सहयोगमा फोहोर प्रशोधन केन्द्र निर्माणको अन्तिम चरणमा पुगेको हो ।
भेरीगंगा, लेकबेसी तथा गुर्भाकोट नगरपालिकाको फोहोर एकै ठाउँमा राखेर प्रशोधन गर्न निर्माण हुन लागेको फोहोर प्रशोधन केन्द्रका लागि हालसम्म लेकबेसी नगरपालिकाले मात्र सम्झौता गरेको भेरीगंगा नगरप्रमुख यज्ञप्रसाद ढकालले जानकारी दिए ।
भेरीगंगा नगरपालिका–१२ को रामजानकी सामुदायिक वनमा प्रशोधन केन्द्र रहेको छ । २० रोपनी जग्गामा उक्त संरचना निर्माण गरिएको छ । २०७९ चैतमा डीपीआर निर्माण गरेर फोहोर प्रशोधन केन्द्र निर्माणका लागि प्रदेश सरकार र नगरपालिकाको संयुक्त लगानीमा काम भइरहेको छ । फोहोर व्यवस्थापन र प्रशोधन गरी ग्यास उत्पादन गर्ने योजनासमेत रहेको उनको भनाइ छ ।
प्रशोधन केन्द्रसम्म पुग्ने पहुँचमार्ग निर्माणलगायतका काम सकिएको नगरपालिकाले जनाएको छ । अन्य संरचना पनि निर्माण भइसकेको छ । सुरुमा फोहोर प्रशोधन केन्द्र निर्माणका लागि प्रदेश सरकारले आर्थिक वर्ष २०७९/८० मा ५० लाख बजेट विनियोजन गरेको थियो । आर्थिक वर्षमा उक्त योजनाको निरन्तरताका लागि प्रदेश सरकारले ५० लाख बजेट विनियोजन गरेको छ । नगरपालिकाले ४९ लाख ५० हजार बजेट छुट्टाएर काम गरेको गरेको थियो ।
हाल सडक, पानीलगायतका कामका लागि भन्दै २०८२ वैशाख २४ गते सौरव निर्माण सेवासँग ९९ लाख ९८ हजार ३५३ रुपैयाँमा बाँकी काम भइरहेको छ । २०८२ असार १५ गतेसम्म काम पूरा गर्ने सम्झौतामा उल्लेख रहेको छ ।
फोहोरबाट ग्यास र मल उत्पादन गर्ने लक्ष्य नगरपालिकाले राखेको छ । पछिल्लो समय सहरीकरण बढ्दै छ । विकासका पूर्वाधार निर्माण भएसँगै गाउँसमेत सहरमा परिणत हुँदै छन् । जनसंख्या पनि बढ्दो छ । फोहोर पनि बढेको छ । यसरी उत्पादित फोहोर व्यवस्थापन चुनौतीपूर्ण बनेको छ ।कारोबार दैनिकबाट साभार।
