185 पटक हेरिएको 
काठमाडौ : रसुवा लगायतका बाढी प्रभावित क्षेत्रमा राष्ट्रिय तथा अन्तर्राष्ट्रिय गैरसरकारी संस्थाहरूबाट हुने राहत तथा सहायता परिचालनमा उल्लेख्य वृद्धि भएको छ। समाज कल्याण परिषद् (SWC) ले सार्वजनिक गरेको पछिल्लो ६ दिनको तथ्याङ्क तुलना गर्दा राहत रकम, सहयोग गर्ने संस्थाको संख्या र प्रधानमन्त्री राहत कोषमा जम्मा हुने रकम सबैमा ठूलो वृद्धि भएको देखिएको हो।
६ दिनमा झण्डै १६ करोड २० लाख रुपैयाँले बढ्यो सहयोग रकम
परिषद्का अनुसार भदौ १८ गतेसम्म बाढी प्रभावित क्षेत्रका लागि कुल ३८ करोड ७२ लाख १६ हजार २५६ रुपैयाँ बराबरको सहयोग जुटेकोमा भदौ २४ गतेसम्म आइपुग्दा यो रकम बढेर ५४ करोड ९२ लाख ९० हजार ४२० रुपैयाँ पुगेको छ। यसरी हेर्दा ६ दिनको अवधिमा मात्रै १६ करोड २० लाख ७४ हजार १६४ रुपैयाँ थप राहत तथा सहयोग परिचालन भएको छ।
संस्थाको संख्यामा पनि तीव्र वृद्धि (४५ बाट बढेर ८२ पुगे)
बाढीपीडितको उद्धार र राहतमा जुट्ने राष्ट्रिय तथा अन्तर्राष्ट्रिय संघसंस्थाको संख्या पनि ६ दिनको अवधिमा करिब दोब्बरले बढेको छ:
• गैरसरकारी संस्था (NGO): भदौ १८ सम्म १५ वटा एनजीओ सक्रिय रहेकोमा भदौ २४ सम्म आइपुग्दा यो संख्या दोब्बर भएर ३० वटा पुगेको छ।
• अन्तर्राष्ट्रिय गैरसरकारी संस्था (INGO): भदौ १८ सम्म ३० वटा आईएनजीओले सहयोग गरेकोमा भदौ २४ सम्म यो संख्या बढेर ५२ वटा पुगेको छ।
राहत सामग्री र प्रधानमन्त्री कोषमा रकमको वृद्धि
६ दिनको फरकमा दुवै क्षेत्र (सामग्री सहयोग र नगद कोष) मा रकम बढेको छ:
१. सामग्री सहयोग:
• एनजीओतर्फ: एनजीओहरूले उपलब्ध गराएको सामग्री सहयोग रकम १२ करोड ६२ लाख ८६ हजार ५४४ रुपैयाँबाट बढेर १५ करोड ८२ लाख ९८ हजार १०१ रुपैयाँ पुगेको छ (३ करोड २० लाखभन्दा बढीको वृद्धि)।
• आईएनजीओतर्फ: आईएनजीओहरूले दिएको राहत सामग्री सहयोग २६ करोड ९ लाख २९ हजार ७१२ रुपैयाँबाट बढेर ३९ करोड ४ लाख २४ हजार ४०५ रुपैयाँ पुगेको छ (१२ करोड ९४ लाखभन्दा बढीको वृद्धि)।
२. प्रधानमन्त्री विपद् राहत कोषमा दाखिला रकम:
• एनजीओहरूले कोषमा जम्मा गरेको रकम ४४ लाख ८६ हजार ५४४ रुपैयाँबाट बढेर १ करोड ७ लाख ६७ हजार ६७७ रुपैयाँ पुगेको छ।
• आईएनजीओहरूले कोषमा जम्मा गरेको रकम २ करोड ८५ लाख ८९ हजार ३९ रुपैयाँबाट बढेर ४ करोड ३६ लाख ७० हजार ४५९ रुपैयाँ पुगेको छ।
• कुल मिलाएर प्रधानमन्त्री राहत कोषमा गैरसरकारी क्षेत्रबाट जम्मा हुने रकम ३ करोड ३० लाख ७५ हजार ५८३ रुपैयाँबाट बढेर ५ करोड ४४ लाख ३८ हजार १३६ रुपैयाँ पुगेको छ।
राहतमा खाद्य, आश्रय र वास (WASH) सामग्रीलाई प्राथमिकता
सुरुवाती दिनहरूमा बाढीका कारण खानेपानी प्रणाली र सरसफाइमा असर परेकाले वास (WASH) सामग्रीलाई प्राथमिकता दिइएको थियो। हाल खाद्यान्न, अस्थायी आश्रय (त्रिपाल/टेन्ट), बत्ती, भान्साका सामान, सरसफाइ, खानेपानी, औषधि तथा स्वास्थ्य सम्बन्धी सामग्रीहरूको वितरणलाई थप तीव्र बनाइएको छ।
समाज कल्याण परिषद्का अनुसार आईएनजीओहरूले स्थानीय साझेदार एनजीओहरूमार्फत तथा राष्ट्रिय विपद् जोखिम न्यूनीकरण तथा व्यवस्थापन प्राधिकरण (NDRRMA), जिल्ला विपद् व्यवस्थापन समिति (DDMC), जिल्ला प्रशासन कार्यालय र स्थानीय तहहरूसँग एकद्वार प्रणालीमार्फत समन्वय गरी राहत वितरण गरिरहेका छन्। यो सहयोग निरन्तर रूपमा अद्यावधिक भइरहने र आगामी दिनमा अझै बढ्ने परिषद्ले जनाएको छ।
