पक्राउ परेकालाई छुटाउन माग गर्दै बन्चरेमा फोहोर विसर्जन गर्न पुनः अवरोध

काठमाडौ : बन्चरेडाँडामा फोहोर विसर्जन गर्न बुधबार साँझ (हिजो) मात्र ४ बुँदे सहमति भएपनि स्थानीयले फोहोर बिसर्जनमा पुनः अवरोध सिर्जना गरेका छन् । स्थानीयले पक्राउ परेका एक जनालाई छुटाउन माग गर्दै फोहोर बोकेको गाडी अवरुद्ध गरेको काठमाडौं महानगरपालिकाका प्रवक्ता नवीन मनान्धरले जानकारी दिनुभयो । स्थानीयले फोहोर विसर्जन गर्न गएका गाडीहरुलाई बिहानैदेखि अवरोध गरेका छन् । बुधबार काठमाडौं, नुवाकोट र धादिङका प्रजिअ र सम्बन्धित पालिकाका प्रमुख प्रशासकीय अधिकृतहरुबीच फोहोर विसर्जन सम्बन्धमा ४ बुँदे सहमति भएको थियो ।

 

पार्किङ गरेर राखिएका फोहोर बोकेको गाडी तोडफोड गरेको आरोपमा प्रहरीले स्थानीयलाई पक्राउ गरेको थियो । सोही पक्राउ परेका स्थानीयलाई निःशर्त रिहाइको माग गर्दै उनीहरु आन्दोलित भएको मानन्धरले जानकारी दिनुभयो । बुधबार भएको ४ बुँदे सहमति पत्रमा पक्राउ परेकाहरुलाई छुटाउने विषय कतै पनि उल्लेख छैन । यद्यपि मौखिक रुपमा उनीहरुलाई छुटाउने प्रशासनले आश्वासन दिएपनि नछुटेपछि स्थानीय बिहानैदेखि आन्दोलनमा उत्रिएका हुन् ।

 

बुधबार भएको सहमतिमा ७ दिनभित्रमा सबै टिपरहरुमा लिचेट नचुहिने व्यवस्था गर्ने, धुलो नियन्त्रण र दुर्गन्ध हटाउन औषधि छर्ने कामलाई प्रभावकारी बनाउने, प्रत्येक ३ दिनभित्र बञ्चरेडाँडा डम्पिङ साइटमा टेपिङ गर्ने काम गर्ने र आसन्‍न निर्वाचनमा अन्तर जिल्ला अपराध नियन्त्रणका लागि आवश्यक पर्ने सुरक्षा व्यवस्थाका लागि समन्वय गर्ने भनिएको छ ।

 

आज बिहीबार दिउँसो धादिङको नौबिसेमा बुधबार भएको सहमतिबारे स्थानीय र सरोकारवालाहरूलाई काठमाडौंका मेयरसहित अन्य पालिकाका जनप्रतिनिधिहरुबीच छलफल हुने कार्यक्रम तय भएको मानन्धरले जानकारी दिनुभयो ।

तपाईको प्रतिक्रिया

सम्बन्धित समाचार