595 पटक हेरिएको 
तुलसीपुर : दाङको तुलसीपुरस्थित राप्ती प्रादेशिक अस्पतालले यसअघि अव्यवस्थितरुपमा फोहर फाल्ने गरेको थियो । अस्पतालले फालेका फोहर किसानको खेतमा गएर खेत जोत्दा किसानका खुट्टामा सुई बिझ्थे । फोहर व्यवस्थापनका लागि धेरै पटक किसान अस्पतालमै पनि पुगे तर, लामो समय किसानले सास्ती नै खेप्नुपर्यो । अस्पताल वरपर नै दुर्गन्धित हुन्थ्यो तर, अब भने त्यो समस्या हटेर गएको छ । अस्पतालमा स्वास्थ्यजन्य फोहर व्यवस्थापन केन्द्र स्थापना भएपछि भने त्यो समस्या अन्त्य भएको छ ।
अब अस्पतालजन्य फोहर त्यही केन्द्रमा पठाउने र सङ्क्रमणयुक्त फोहरलाई सङ्क्रमणमुक्त बनाइने छ । गल्ने, नगल्ने फोहरलाई छुट्टै राखिनेछ । अस्पतालका प्रमुख निमित्त मेडिकल सुपरिटेन्डेन्ट डा ओम अर्यालका अनुसार सङ्क्रमण मुक्त बनाइएका ती फोहरलाई उपमहानगरपालिकाको जिम्मा लगाइनेछ । “पहिले नगरपालिकाले पनि लिन नमानेपछि हामीले गाड्ने, जलाउने र त्यतिकै फाल्ने पनि गरिएको अवस्था थियो”, उहाँले भन्नुभयो, “तर, अब सङ्क्रमणमुक्त बनाएपछि नगरपालिकासँग समन्वय गरेर व्यवस्थापन हुनेछ, यसले अस्पतालको फोहर व्यवस्थापनमा सहज भएको छ ।”
अस्पतालमा फोहरलाई सङ्क्रमणमुक्त गर्नका लागि दुई वटा मेसिन जडान गरिएको छ । ती मेसिनबाट फोहरलाई सङ्क्रमणमुक्त गरेपछि छुट्टै राखिन्छ, र उपमहानगरपालिकालाई जिम्मा लगाइन्छ । युएनडिपी र च्याइन एडले उक्त केन्द्र स्थापना गरेका हुन् । रु दुई करोड ५० लाख लागतमा उक्त केन्द्र स्थापना गरिएको हो । घरमा हुने फोहर र अस्पतालमा हुने फोहरमा निक्कै फरक हुने भन्दै यसलाई व्यवस्थापन गर्न आफूहरूले भवन निर्माण गरेको युएनडिपीका आयोजना प्रबन्धक राजेश मिश्रले बताउनुभयो ।
अस्पताल सफा नभएमा झनै रोग फैलिन सक्ने भन्दै दाङसहित विभिन्न छ अस्पतालमा यस्ता सरसफाइ केन्द्र स्थापना गरिएको हो । एक वर्षदेखि निर्माण थालिएको उक्त कार्य भर्खरै सम्पन्न भएर अस्पताललाई हस्तान्तरण गरिसकेको छ । यहाँ जोडिएका मेसिन उच्च गुणस्तरको भएको समेत मिश्रले दाबी गर्नुभयो । यो मेसिन जडानका लागि चीनबाट प्राविधिक आएका थिए । साथै त्यहाँ कार्यरत कर्मचारीलाई सिकाउनका लागि तीन दिने तालिमसमेत प्रदान गरिएको छ ।
