382 पटक हेरिएको 
जुम्ला : जुम्लाका ८ हजार बढी घरधुरीमा ‘एक घर, एक धारा’सहित निर्माण गर्न लागिएको धौलिगाड खानेपानी आयोजना अलपत्र परेको छ । निर्माण सुरु भएको पाँच वर्षसम्म आयोजना अघि नबढ्दा जुम्लामा स्वच्छ खानेपानीको अभाव देखिएको छ । २०७८ चैत ५ गते तत्कालीन खानेपानीमन्त्री उमाकान्त चौधरीले आयोजना शिलान्यास गरेका थिए । २०६६ सालदेखि प्रक्रिया थालिएको आयोजनाले २०७८ सालबाट औपचारिक निर्माण सुरु भएको थियो ।
प्रि-इन्सुलेट पाइप विभागले स्वीकृति नगर्दा समस्या
पहिलो प्याकेजको मुहान क्षेत्रमा भने अहिलेसम्म कुनै काम सुरु भएको छैन । समुद्री सतहदेखि चार हजार मिटर उचाइमा रहेको मुहान क्षेत्रमा बाह्रै महिनामा अत्यधिक चिसो हुने र मंसिरदेखि चैतसम्म हिउँ जम्ने भएकाले पानी नजम्ने (प्रि-इन्सुलेट ) पाइप खरिद टुंगो नलाग्दा काम रोकिएको हो ।
मुहान क्षेत्रमा ५१ सय मिटर प्रि-इन्सुलेट (पानी नजम्ने) पाइप बिछ्याउने स्टमेट छ । यद्यपि हालसम्म खरिदको टुंगो लागेको छैन । प्रिइन्सोलेट पाइप चीन, सिंगापुरमा मात्रै पाइने र खरिदका लागि खानेपानी विभागले स्वीकृति प्रदान गर्नुपर्ने भए पनि पटकपटक स्वीकृति माग गर्दा विभागले वास्ता नगरेपछि मुहान क्षेत्रको काम अघि नबढेको आयोजनाका साइट इन्जिनियर डिपेश शाहले बताए । धौलिगाड खानेपानी आयोजना निर्माणको ठेक्का ‘कालिका सिएबी कनकाई जेभी’ले पाएको छ ।
निर्माण कम्पन्नीका साइट इन्जिनियर डिपेश शाहका अनुसार हालसम्म चारपटक विभागमा पाइप खरिदको स्वीकृतिका लागि माग गरिएको छ । उनले भने, ‘प्रिइन्सुलेट पाइप खरिदबिना अन्य संरचना बनाएर काम छैन । खरिदका लागि विभागले स्वीकृति दिएको खण्डको खरिद गरेर नेपाल ल्याउन कम्तीमा ६ महिना लाग्छ । स्वीकृति नपाउँदा मुहानमा काम शून्य भएको छ ।’
पाइप खरिदको स्वीकृतिका लागि २०८० वैशाख ६ गते पहिलोपटक, २०८१ कात्तिक ६ गते दोस्रो, २०८१ मंसिर १० गते तेस्रो र २०८२ जेठ ६ गते गरी चौथोपटक स्वीकृतिका लागि विभागमा पत्र पठाइएको छ । पाइप खरिदका लागि कुल चार करोड बजेट छुटाइएको छ ।
यता धौलिगाड खानेपानी आयोजनाका प्रमुख मनोजराज दैवज्ञले प्रिइन्सोलेट पाइप खरिदका लागि प्रक्रिया अघि बढेको बताए । विविध कारणले ढिला भए पनि पहिलो प्याकेजको काम गरिरहेको चन्द्र एन्ड वसन्त निर्माण सेवाले तीनवटा फर्म तयार गरेर फाइल पेस गरेकाले अबको एक सातामा खानेपानी विभागले स्वीकृति दिने आयोजना प्रमुख दैवज्ञले जानकारी दिए । उनले भने, ‘निर्माण व्यवसायीले नै बाहिरबाट उक्त पाइप ल्याउनेछन् । प्राविधिक कारण ढिला भए पनि अहिले द्रुत गतिमा काम भइरहेको छ ।’ यो खबर कारोबार दैनिकबाट साभार गरिएको हो।
