117 पटक हेरिएको 
म्याग्दी : म्याग्दीको धवलागिरि गाउँपालिका–५, मल्कवाङमा ‘एक घर, एक धारा’ सहितको खानेपानी आयोजना निर्माण भएको छ ।
कुल ५४ लाख ३६ हजार ४२ को लागतमा निर्माण भएको आयोजनाबाट ८९ वटा धारामार्फत घरघरमा खानेपानी वितरणको व्यवस्था मिलाइएको हो । ८६ निजी घर, विद्यालय, स्वास्थ्यचौकी र वडा कार्यालयमा मिटरसहितको निजी धारा जडान गरेर खानेपानी वितरण गरिएको उपभोक्ता समितिका अध्यक्ष रासबहादुर छन्त्यालले जानकारी दिनुभयो ।
उहाँका अनुसार नेवा संस्थाको २६ लाख ९९ हजार ८४, गाउँपालिकाको १९ लाख २५ हजार १११ लगानी भएको योजना निर्माणका लागि उपभोक्ताले एक लाख ५७ हजार ९३० नगद लगानी र छ लाख ५३ हजार ९१७ बराबरको श्रमदान गरेका छन् ।
मल्कवाङमा यसअघि सार्वजनिक धारामार्फत खानेपानी वितरण हुने गरेको थियो । आँगनकै धारामा नियमित स्वच्छ खानेपानी आपूर्ति भएपछि समयको बचत र झन्झट हटेको छ । धवलागिरि गाउँपालिका–५, मल्कवाङ, मलम्पार र भेडिखाल्टा टोलका एक सय ८५ घरमा निजी धारा जडान गरेर खानेपानी सुविधा विस्तार गरिएको वडाध्यक्ष अमर छन्त्यालले बताउनुभयो । रासस
