201 पटक हेरिएको 
लमजुङ : लमजुङ जिल्लामा वितरण भइरहेको र नागरिकले प्रयोग गर्दै आएको खानेपानीको अवस्था निकै भयावह र स्वास्थ्यका लागि असुरक्षित देखिएको छ।
प्रदेश जनस्वास्थ्य कार्यालय लमजुङले भर्खरै सार्वजनिक गरेको खानेपानी गुणस्तर परीक्षण प्रतिवेदन अनुसार जिल्लाका अधिकांश खानेपानीका स्रोत तथा आयोजनाहरू प्रदूषित र पिउन अयोग्य पाइएका छन्।
७७ प्रतिशत पानीका स्रोतहरू प्रदूषित
जनस्वास्थ्य कार्यालयले जिल्लाभर सञ्चालित विभिन्न १२९ वटा पानीका स्रोतहरूको नमुना परीक्षण गरेको थियो। उक्त परीक्षणबाट प्राप्त नतिजा झस्काउने खालको छ, जसमध्ये ९८ वटा (अर्थात् ७७ प्रतिशत) स्रोतहरू पूर्ण रूपमा प्रदूषित भेटिएका छन्।
८१ प्रतिशत खानेपानी आयोजनाको पानी पिउन अयोग्य
स्रोत मात्र होइन, नागरिकको घर-घरमा पानी पुर्याउने उद्देश्यले निर्माण गरिएका खानेपानी आयोजनाहरूको अवस्था झनै नाजुक छ।
जिल्लामा सञ्चालित ८६ वटा खानेपानी आयोजना मध्ये ७० वटा (अर्थात् ८१ प्रतिशत) आयोजनाको पानी पिउनका लागि अयोग्य प्रमाणित भएको छ।
प्रयोगशाला परीक्षणका क्रममा अधिकांश खानेपानीका नमुनाहरूमा मानव मलमूत्रमा पाइने घातक दिसाजन्य जीवाणु ‘इ-कोलाई’ (E.Coli) फेला परेको छ।
पानीमा यस्तो जीवाणु भेटिनुको अर्थ सिधै पानी पिउँदा झाडापखाला, हैजा, टाइफाइड र पेट सम्बन्धी गम्भीर रोगहरू लाग्ने उच्च जोखिम रहनु हो।
पानी सिधै पिउन नमिल्ने भएकाले स्वास्थ्यकर्मीहरूले सर्वसाधारण नागरिकलाई अनिवार्य रूपमा पानी उमालेर, फिल्टर गरेर वा उचित रूपमा प्रशोधन गरेर मात्रै प्रयोग गर्न विशेष आग्रह गरेका छन्।
यस संवेदनशील अवस्थालाई ध्यानमा राख्दै प्रदेश जनस्वास्थ्य कार्यालयले खानेपानीको नियमित गुणस्तर परीक्षण गर्न, पानीका मुहान तथा स्रोतहरूको उचित संरक्षण गर्न र सुरक्षित खानेपानीको प्रयोगबारे आम नागरिकमा सचेतना फैलाउन सबै सरोकारवाला निकाय र स्थानीय बासिन्दाहरूलाई सचेत र जिम्मेवार बन्न अपिल गरेको छ।
