881 पटक हेरिएको रोल्पा : रोल्पालाई खुला दिसामुक्त घोषणा गरेपछि सरसफाइ अभियान सुस्ताएको छ । जिल्लालाई खुला दिसामुक्त घोषणा गरेपनि थप सरसफाइको काम हुन नसकेको हो । वि.सं. २०७२ पुस ९ गते उपराष्ट्रपति नन्द बहादुर पुनले रोल्पा खुला दिसामुक्त भएको घोषणा गर्नुभएको थियो ।
त्यसपछि जिल्ला खानेपानी, सरसफाइ तथा स्वच्छता समन्वय समितिले आव २०७३/७४ को असार मसान्तभित्र जिल्लाका साबिक पाँच वडालाई पूर्ण सरसफाइ घोषणा गरे पछि थप कार्यक्रम अघि बढ्न नसक्दा नागरिकमा निराशा छाएको छ ।
स्थानीय तहको निर्वाचनमा सबैको ध्यान जाँदा तोकिएको समयमा पूर्ण सरसफाइ वडा घोषणा गर्न नसकिएको जिल्ला समन्वय समितिका सरसफाइ फोकल पर्सन दामोदरप्रसाद सुवेदीले बताउनुभयो ।
जिसस, खानेपानी तथा सरसफाइ सबडिभिजन कार्यालय तथा सरसफाइका क्षेत्रमा क्रियाशील गैरसरकारी संस्था र परियोजनाले जिल्लामा पूर्ण सरसफाइको काम गरिरहेको बताइएको छ । पूर्ण सरसफाइ तथा सूचकका विषयमा सचेतीकरण गर्ने काम भइरहेको सरसफाइ सबडिभिजन कार्यालयका स्रोत व्यक्ति डिल्लीराज न्यौपानेले जानकारी दिनुभयो ।
वर्षात् सकिने बित्तिकै घर्तीगाउँ, ओत, भावाङ, रांसी, ह्वामा, घोडागाउँ र गुम्चालका १० वडालाई पूर्ण सरसफाइयुक्त वडा घोषणा गर्ने तयारी भइरहेको छ ।
जिल्लालाई खुला दिसामुक्त गरिएसँगै झाडापखाला, आउँ, कमलपित्त लगायत बिरामीको संख्या घटेको बताइएको छ । स्वास्थ्यमा सुधार हुनाका साथै गाउँघरमा दिसा देखिन छाडेको न्यौपानेले बताउनुभयो ।
सदरमुकाम लगायत बजार क्षेत्रमा निर्माण गरिएका शौचालयको प्रयोग र व्यवस्थापनमा देखिएको समस्या एवं बजार क्षेत्रमा खुला ठाउँमा देखिने दिसाले भने अभियान माथि नै प्रश्न उठाइएको छ ।
स्वच्छता समन्वय समितिले जिल्ला स्तरीय पूर्ण सरसफाइ रणनीतिक योजना तयार गरी कार्यान्वयन गरिरहेको छ । जिल्लालाई खुला दिसामुक्त घोषणा गरेसँगै सुस्ताएको सरसफाइ अभियानले नयाँ जनप्रतिनिधि पाएसँगै तीव्रता पाउने अपेक्षा गरिएको छ ।
जिल्लालाई सन् २०२२ भित्र पूर्णसरसफाइ जिल्ला घोषणा गर्ने लक्ष्य राखिएको छ ।
