247 पटक हेरिएको 
काठमाडौं : खानेपानी तथा ढल व्यवस्थापन विभागले हेटौंडाको राप्ती नदीबाट पर्सा र बारा तथा सुनकोशी र कमला नदीको पानी सिरहा र सप्तरीमा आपूर्ति गर्न सम्भाव्यता अध्ययन गर्ने भएको छ। यसको लागि विभागले सम्भाव्यता अध्ययन गर्न परामर्शदाताहरूबाट आशय पत्र पेश गर्न सूचना जारी गरेको छ ।
जलवायु परिवर्तनका कारण नेपालको पानी स्रोतहरूमा गम्भीर असर परेको तथा विशेष गरी तराई क्षेत्रमा भूमिगत पानीको सतह घट्दै गएको, मधेस प्रदेशका जिल्लाहरू, विशेष गरी पर्सा र बारामा लामो समयदेखि खानेपानीको समस्याबाट ग्रस्त रहेकाले त्यसको समाधान गर्न जलाशययुक्त खानेपानी आयोजना गर्ने अवधारणा अनुरुप यो अध्ययन गर्न लागेको विभागले जनाएको छ।
राप्ती नदीबाट पर्सा र बाराका लागि पानी स्थानान्तरण अध्ययन स्थानीय जलस्रोत अभावको दीर्घकालीन समाधान गरी जलस्रोतको दीगो उपयोग गर्न र जलवायु परिवर्तनको असर न्यूनीकरण गर्न महत्त्वपूर्ण रहने खानेपानीमन्त्री प्रदीप यादवले बताउनुभयो । उहाँका अनुसार यो अध्ययनले उपयुक्त प्रविधि, लागत, वातावरणीय प्रभाव तथा सम्भाव्यताका अन्य पक्षहरू पहिचान गर्न मद्दत गर्नेछ। जसले भविष्यमा विस्तृत अध्ययन तथा कार्यान्वयनको आधार तयार गर्नेछ ।
बारा, पर्सा, सिरहा र सप्तरीमा हालको पानी अभावको अवस्थाको अध्ययन गर्ने र पानीको मागको विश्लेषण अन्तर्गत आगामी २५ वर्षको लागि आवश्यक खानेपानीको प्रक्षेपण गरी दीगो सामाधानको लागि सम्भावित जलस्रोतहरूको पहिचान गरी राप्ती नदी र सप्तकोशी तथा कमला नदी र अन्य वैकल्पिक जलस्रोतहरूको गुणस्तर, उपलब्धता, तथा स्थायित्वको मूल्याङ्कन, वातावरणीय र सामाजिक प्रभाव अध्ययन जलस्थानान्तरण तथा वितरण संरचनाहरूले वातावरण र समुदायमा पार्ने प्रभावको प्रारम्भिक मूल्याङ्कन तथा लगानी र लागत लाभ विश्लेषण, परियोजनाको लागत तथा संभावित लाभहरूको अध्ययन गर्नेछ ।
परियोजनाको कार्यको क्षेत्र र अध्ययन प्रक्रिया अन्तर्गत अध्ययनको सेवा क्षेत्र अन्तर्गत बारा र पर्सा तथा सिरहा र सप्तरीकाका भूभागहरू सामेल रहेका छन् भने हाइड्रोलोजिकल, जियोलोजिकल तथा सामाजिक सर्वेक्षणहरू गरी जलस्रोतको उपयोग तथा जलस्थानान्तरण प्रणालीको प्रभावकारिता निर्धारण तथा पानी वितरण प्रणाली, टनेल वा पाइपलाइन संरचनाहरूको सम्भाव्यता अध्ययन गरिनेछ।
