163 पटक हेरिएको 
भरतपुर : भरतपुर महानगरपालिकाका कार्यबाहक नगरप्रमुख चित्रसेन अधिकारीले फोहोरमैला व्यवस्थापन तथा न्यूनीकरणका लागि नीतिनिर्माणलाई पहिलो प्राथमिकतामा राखिएको बताउनु भएको छ ।
बुधबार युरोपियन युनियनको सहयोगमा क्रीएसन नेपाल द्वारा सञ्चालित ग्रीनसिफ्ट परियोजना अन्तर्गत फोहोरमैला व्यवस्थापन नीति निर्माणका लागि आयोजित प्रारम्भिक कार्यशालामा अधिकारीले महानगरपालिकाको टोली यस विषयमा गम्भीरतापूर्वक लागि परेको बताउनुभयो। उहाँले दीर्घकालीन रूपमा प्रभावकारी फोहोरमैला व्यवस्थापनका लागि स्पष्ट नीति आवश्यक रहेको उल्लेख गर्नुभयो।
कार्यक्रममा क्रीएसन नेपालकी कार्यक्रम निर्देशक सुजाता कोइरालाले भरतपुर महानगरका लागि आवश्यक कानुन निर्माणमा सहयोग पुर्याउनु परियोजनाको महत्वपूर्ण उद्देश्य रहेको बताउनुभयो। उहाँका अनुसार स्थानीय तहमा दिगो फोहोरमैला व्यवस्थापन प्रणाली विकास गर्न नीतिगत आधार बलियो बनाउनुपर्ने आवश्यकता रहेको छ।
कार्यशालामा वातावरण अभियन्ता, सरोकारवाला निकायका प्रतिनिधि, पत्रकार, नागरिक समाज, व्यवसायी तथा फोहोरमैला संकलनकर्ताहरूले फोहोरमैला व्यवस्थापनलाई प्रभावकारी, व्यावहारिक र दिगो बनाउने विषयमा आफ्ना धारणा राख्नुभयो।
भरतपुर महानगरपालिकाको फोहोरमैला व्यवस्थापन महाशाखाका प्रमुख इन्जिनियर बिराट घिमिरेले क्रीएसन नेपालसँगको सहकार्यले महानगरका लागि उपयुक्त र प्रभावकारी नीति निर्माणमा महत्वपूर्ण कडी साबित हुने विश्वास व्यक्त गर्नुभयो।
Photos : Anant Anurag/Center for Research and Sustainable Development Nepal (CREASION)
