14694 पटक हेरिएको जनकपुरधामस्थित संघीय खानेपानी तथा ढल व्यवस्थापन कार्यालयका निमित्त प्रमुख सिनियर डिभिज्नल इन्जिनियर राजेश कुशवाहा त्यो दिन आफ्नो अन्तिम हाजिरी गर्दै हुनुहुन्थ्यो । तीन बर्षदेखि उक्त कार्यालयमा कार्यरत ईन्जिनियर कुशवाहाको अर्घाखाँचीमा सरुवा भईसकेकाले उहाँ त्यो दिन कर्मचारीबाट बिदाई हुन मात्र कार्यालयमा जानुभएको थियो ।
आफ्नो तीन बर्षे कार्यकाल सफलतापूर्वक पूरा गरी बिदाई हुने तरखरमा रहेका ईन्जिनियर कुशवाहाले त्यो दिन मातहतका कर्मचारीलाई कति धेरै कुरा गर्नु थियो होला ? तर उहाँले न आफ्ना कुरा सुनाउन पाउनुभयो न त आफ्ना सहकर्मीको माया बोकेर निधार भरि अबीरै अबीर र खादा तथा फूलमालाले भरिएर कार्यालयबाट निस्कने चाहना नै पूरा भयो ।
त्यही बेला जिन्दगीमा सोच्दै नसोचेको घटना सँग सामना गर्नुप¥यो । घटना थियो सिके राउतका कार्याकर्ताहरुद्वारा दुर्व्यवहार । एउटा खुसीको क्षण नजिकै आईरहेकै बेला यत्रो ठूलो दुर्व्यवहार होला भन्ने सायद सपनामा पनि सोच्नु भएको थिएन, उहाँले ।
घटनाको सर्वत्र निन्दा भयो, पेशागत संघसंगठनले दोषी उपर कडा कार्वाहीको माग गर्दै आन्दोलनका कार्यक्रमहरु पनि घोषणा गरिए । स्वयं सिके राउत र उनका कार्यकर्ताले ईन्जिनियर कुशवाहा माथि भ्रष्टाचारको आरोप लगाएर बिषयलाई मत्थर पार्न पनि खोजे । तर सिके राउतको घर जाने बाटो कालोपत्रे नगर्दाको रीस इन्जिनियर कुशवाहा माथि पोखेको भन्दा अरु कुनै कारण नरहेको पुष्टि भएको छ ।
विस्तृतमा सुनौं, ईन्जिनियर कुशवाहासँग वास खबरले गरेको टेलिफोन सम्वाद
दुर्व्यवहार गर्नुको कारण सडक कालोपत्रे नै थियो भन्ने प्रमाण :
जनकपुर उपमहानगरपालिका वडा नं. ७ र ८ का बासिन्दाको हस्ताक्षर सहित बलुवाटोल स्थित मिडिया काउन्सिलदेखि वडा नं. ८ को कार्यालय सम्मको बाटो पूर्णतः क्षतिग्रस्त भई एम्बुलेन्स समेत जान नसकेको र अबिलम्ब ढलान गरिदिनुहुन भन्दै सुरुमा जनकपुर उपमहानगरपालिकामा निवेदन दिएका थिए । निवेदन पेश गरेको दिन थियो २०७८ असोज २२ गते ।
त्यसको २ दिन पछि अर्थात २०७८ असोज २४ गते जनमत पार्टीकै कार्यकर्ताहरुले तीन बुँदे माग सहित जनकपुर उपमहानगरपालिकामै ज्ञापन पत्र बुझाएका थिए । जसमा पहिलो माग बलुवाटेल स्थित मिडिया काउन्सिलदेखि वडा नं. ८ को कार्यालयसम्मको बाटो अविलम्ब कंक्रिट ढलान गर्नुपर्ने उल्लेख थियो ।
दुई दिन अगाडि वडा नं. ७ र ८ का बासिन्दाद्वारा भन्दै पेश गरिएको निवेदन उनै जनतमत पार्टीका कार्यकर्ताहरुले नै पेश गरेका थिए भन्ने प्रमाण हेर्न पहिलो बुँदा नै काफी छ ।
हेर्नुहोस् जनमत पार्टीले जनकपुर उपमहानगरपालिकामा बुझाएको ज्ञापन पत्र :
जनकपुर उपमहानगरपालिकाले सोही दिन जनमत पार्टीको मागको सन्दर्भमा सुनुवाई गर्दै संघीय खानेपानी तथा ढल व्यवस्थापन कार्यालयलाई पत्र लेख्ने र जनमत पार्टीलाई जानकारी गराउने भनी तोक लगाईएको थियो ।
उपमहानगरपालिका कार्यालयले त्यसको भोलिपल्ट नै क्षतिग्रस्त सडक निर्माण गर्न भन्दै संघीय खानेपानी तथा ढल व्यवस्थापन आयोजना कार्यालयलाई पत्र लेख्यो ।
हेर्नुहोस् पत्रको व्यहोरा :
त्यो सडक कालोपत्रे गर्ने काम आफ्नो कार्यालयको क्षेत्राधिकार भित्र नपर्ने भएकाले कसले कसरी गर्ने भन्ने बिषयमा छलफल चलिरहेकै थियो । तर पन्ध्र दिनको अल्टिमेटम दिएका जनमतका कार्यकर्ताको निशानामा पर्नुभयो संघीय खानेपानी तथा ढल व्यवस्थापन आयोजना कार्यालय जनकपुरका नि.प्रमुख सिनियर डिभिज्नल ईन्जिनियर राजेश कुशवाहा । असोज २४ गते तीन बुँदे माग राख्दै ज्ञापन पत्र बुझाउँदा नै जनमतका कार्यकर्ताले १५ उक्त मागहरु पूरा गर्न १५ दिनको अल्टिमेटम दिएका थिए । अल्टिमेट पूरा हुनु २ दिन अगावै ईन्जिनियर कुशवाहा माथि उनीहरुले दुर्व्यवहार गरेका हुन् ।
