937 पटक हेरिएको काठमाडौ : विश्व चर्पी दिवस नेपालमा पनि विभिन्न कार्यक्रम गरी मनाइने भएको छ । हरेक बर्षको नोभेम्बर १९ तारीखमा मनाउदै आएको विश्व शौचालय दिवस केन्द्र, प्रदेश र स्थानीय तहसम्म विभिन्न कार्यक्रम गरी मनाइने तय भएको छ ।
दिवसका दिन SNV नेपालको सहयोगमा खानेपानी तथा ढल निकास विभागले छलफल तथा कार्यपत्र प्रस्तुतीकरण कार्यक्रमको आयोजना गरेको छ । ललितपुरको एक होटलमा आयोजना गरिएको कार्यक्रममा नेपालमा सरसफाइ अभियान र फोहोर पानी व्यवस्थापन, ठूला तथा साना शहरमा फोहोरपानी व्यवस्थापनका लागि नेपालले गर्दै आएको काम, अपाङ्गता भएका व्यक्तिहरुका लागि खानेपानी र सरसफाइ तथा नीतिगत व्यवस्था र प्रतिबद्धताका विषयमा कार्यपत्र प्रस्तुत गरिनेछ ।
कार्यक्रम खानेपानी तथा सरसफाइ मन्त्रालयका सचिव कृष्णराज विसीको प्रमुख आतिथ्यमा खानेपानी तथा ढल निकास विभागका महानिर्देशक तेजराज भट्टको अध्यक्षतामा हुने विभागले जनाएको छ । कार्यक्रममा खानेपानी तथा सरसफाइसँग सम्बन्धित अन्य मन्त्रालयका सचिव तथा सहसचिवहरुको समेत सहभागिता हुनेछ ।
काठमाडौ विश्वविद्यालयले पनि विश्व चर्पी दिवस मनाउने
काठमाडौ विश्वविद्यालय केन्द्रीय क्याम्पस धुलिखेलले पनि विभिन्न कार्यक्रमको आयोजना गरी विश्व शौचालय दिवस मनाउने भएको छ । दिवसको अवसरमा क्याम्पसले फोटो, पोष्टर र निबन्ध प्रतियोगिता गर्ने भएको छ । क्याम्पसले सार्वजनिक शौचालय, मन्दिर, बजार जस्ता सार्वजनिक स्थलको अस्थायी शौचालय लगायतको विषयमा फोटो तथा पोष्टर प्रतियोगिता गर्न लागेृको हो ।
प्रतियोगितामा भाग लिन चाहनेले आज बेलुकी पाँच बजेभित्र आवेदन दिनुपर्ने र दिवसका दिन प्रथम, द्धितिय र तृतीय प्रतियोगीलाई पुरस्कृत गरिने विश्वविद्यालयले जनाएको छ । विश्वविद्यालयले फोटो र पोष्टर दुवै तर्फ प्रथम पुरस्कार १५ हजार, द्धितिय पुरस्कार १० हजार र तृतीय पुरस्कार ५ हजार रुपैयाँ तोकेको छ ।
दिवसका दिन नोभेम्बर १९ तारीखमा विहान काठमाडौमा प्रभातफेरी कार्यक्रम हुनेछ । त्यसपछि भृकुटीमण्डपबाट काठमाडौ विश्वविद्यालय केन्द्रीय क्याम्पस धुलिखेलमा गई विभिन्न छलफल कार्यक्रमको आयोजना गरी प्रतियोगितामा स्थान हासिल गर्न सफल प्रतियोगीलाई त्यही दिन पुरस्कार वितरण गरिनेछ ।
नेपाललाई यही डिसेम्बर भित्र खुला दिसामुक्त घोषणा गर्ने लक्ष्य राखेर कार्यक्रम अघि बढाइएपनि अझै पनि ठूलो जनसंख्या शौचालयको पहुँच बाहिर छ। अहिलेसम्म ४२ जिल्लालाई खुला दिशामुक्त जिल्ला घोषणा गरिएको छ।
