307 पटक हेरिएको 
काठमाडौ : स्वास्थ्य संस्थाबाट उत्पादन हुने हानिकारक फोहोरलाई निर्मलीकरण गर्न एकीकृत प्लान्ट स्थापना गर्ने भएको छ । मनमोहन मेडिकल कलेजको जग्गामा एकीकृत प्लान्ट स्थापना गर्न काठमाडौ महानगरपालिका र कजेज बीच सहमति भएको हो ।
महानगरपालिकाका उपप्रमुख एवं अनुगमन समितिका संयोजक सुनिता डंगोलको अध्यक्षतामा कलेजका पदाधिकारीसँगको बैठकले कलेजको जग्गामा प्लान्ट स्थापना गरी महानगरपालिकाले आवश्यक साधन तथा उपकरण सहयोग गरी एकीकृत केन्द्र सञ्चालनमा ल्याउन सहकार्य गर्ने सहमति भएको हो।
यही सहमतिका आधारमा स्थलगत अवलोकन गर्ने, डिजाइन र लागत इष्टिमेट तयार पार्ने तथा सहभागिता र सञ्चालन विधि तयार पारेर सम्झौता हुनेछ ।
‘महानगरपालिकाले स्वास्थ्य प्रबर्धन केन्द्र सञ्चालन गरिरहेको छ । यी केन्द्रहरुबाट उत्पादन हुने हानीकारक फोहोर प्रशोधन गर्ने केन्द्रका लागि सहकार्य गर्न थालेका हौँ । यसलाई नमूना बनाएर स्वास्थ्य संस्थाहरुकै बिचको सहकार्य एकीकृत प्रशोधन केन्द्र स्थापना गर्न सकिन्छ’ उपप्रमुख डंगोलले भन्नुभयो।
स्वास्थ्य संस्थाजन्य फोहोर व्यवस्थापनको अनुगमन गर्ने क्रममा देखिएको अवस्थाका विषयमा कुरा गर्दै उहाँले भन्नुभयो, ‘अस्पतालहरुबाट उत्पादन हुने सबै फोहोर हानिकारक हुँदैनन् । स्रोतमा सुरक्षित वर्गीकरण गरेर जोखिमयुक्त फोहोरलाई जोखिममुक्त बनाउन सबै स्वास्थ्य संस्थाले काम गर्नु पर्ने देखिएको छ । अन्य फोहोरलाई पुनःप्रयोग र पुनःचक्रिय प्रयोगमा ल्याउन सकिन्छ । यसमा एउटा एकीकृत अभ्यास गरौँ । यसको सफल अभ्यासलाई प्रबर्धन गरौँ ।’
बैठकमा अस्पतालका अध्यक्ष डा. वंशीधर मिश्रले, अस्पताल परिसर स्वयम्भूमा आन्तरिक प्रयोजनका लागि प्रशोधन प्लान्ट स्थापना गर्न लागिएको बताउँदै, प्राविधिक रुपमा उपयुक्त भए यही ठाउँमा, नभए अस्पतालको नाममा रहेको अन्य जमिनमा भए पनि सहकार्यबाट एकीकृत केन्द्र बनाउन तयार रहेको बताउनुभयो ।
महानगरपालिकाको वातावरण व्यवस्थापन विभागले अहिलेसम्म ५० वटा अस्पतालको फोहोर व्यवस्थापन आचरण तथा अभ्यासको अनुगमन सम्पन्न गरिसकेको छ । यसमध्ये मिश्रित फोहोर भएका र निर्मलीकरण अभ्यासमा कमजोरी भेटिएका २० वटा अस्पतालको फोहोर रोकिएको थियो । यसरी फोहोर रोकिएका मध्ये पनि १८ वटाको पुनःअनुगमन गरिसकिएको छ ।
