127 पटक हेरिएको 
काठमाडौं : भोटेकोशी बाढी प्रभावित रसुवा, नुवाकोट र धादिङका विभिन्न विद्यालय तथा समुदायमा अत्यावश्यक सामग्री उपलब्ध गराउँदै अस्थायी संरचना निर्माणमा जुटेको All Hands and Hearts नामक संस्थाले स्टार बोर्डिङ स्कुलमा स्नानघर निर्माण सम्पन्न गरेको छ।
संस्थाले विद्यालयमा महिला र पुरुषका लागि छुट्टाछुट्टै प्रयोग गर्न मिल्ने स्नान कक्ष निर्माण गरेको हो। स्नानघरमा पानीसम्म सहज र सुरक्षित पहुँचको व्यवस्था गरिएको जनाइएको छ।
विपद् वा संकटको अवस्थामा विद्यालय समुदायले सामना गर्नुपर्ने आधारभूत आवश्यकता मध्ये सुरक्षित पानी, सरसफाइ तथा व्यक्तिगत स्वच्छताका सुविधालाई महत्वपूर्ण मानिन्छ। यही आवश्यकतालाई ध्यानमा राख्दै विद्यालयमा स्नानघर निर्माण गरिएको संस्थाले जनाएको छ।
निर्माण सम्पन्न भएको स्नानघरले विद्यालयका विद्यार्थी, शिक्षक तथा अन्य विद्यालय समुदायलाई दैनिक सरसफाइ कायम राख्न सहज हुने अपेक्षा गरिएको छ। महिला र पुरुषका लागि छुट्टाछुट्टै निजी स्थानको व्यवस्था भएपछि विशेष गरी व्यक्तिगत गोपनीयता र मर्यादा कायम राख्न सहयोग पुग्नेछ।
टोलीले विभिन्न जिल्लाका विद्यालय तथा समुदायमा स्थानीय आवश्यकता पहिचान गर्दै अत्यावश्यक सामग्री वितरण र अस्थायी संरचना निर्माणको कामलाई निरन्तरता दिइरहेको जनाएको छ।
स्टार बोर्डिङ स्कुलमा निर्माण सम्पन्न भएको स्नानघर आकारमा सामान्य भए पनि संकटका बेला विद्यालय समुदायलाई सहजता, सुरक्षा र मर्यादा फर्काउन महत्वपूर्ण सहयोग पुग्ने आधारभूत सुविधाका रूपमा लिइएको छ।
