बाढीपहिरोले कालिकोटमा २९ खानेपानी आयोजना बगायो

कालिकोट : कालिकोटका रास्कोट, नरहरिनाथ र सान्नी त्रिवेणीमा बाढीपहिरोले खानेपानी, सिँचाई र सडक अवरुद्ध हुँदा जनजीवन कष्टकर बनेको छ । पहिरोले रास्कोट नगरपालिकाका २९ वटा खानेपानी स्किम बाढी पहिरोले बगाएको छ भने १४ वटा सिँचाई कूलो भत्काएको नगर प्रमुख काशीचन्द्र बरालले जानकारी दिनुभयो।

उहाँले खानेपानी अभावमा गाउँमा हाहाकार भएको बताउनुभयो । ‘क्षरास्कोट त टापुजस्तो भयो । हिँड्ने सडक छैन, पिउने पानी छैन, विद्युत् नहुँदा मिल चल्दैन, खोलाका घट्ट सबै बगिसके ।’ नगर प्रमुख बरालले भन्नुभयो । उहाँका अनुसार रास्कोटमा मात्र ३ सय ६० परिवार विस्थापित भएका छन् । पहिरोले रास्कोट नगरपालिकामा खानेपानी र सिँचाईको सेतुका रुपमा प्रयोग भएका फुगाड, लडेखोला, बगाने खोला, घट्टे खोला, बुढीसैन, तुसारे खोलामा आएको बाढीले सबै संरचना क्षतविक्षत पारेको छ ।

बाढी पहिरोले कालीकोटमा २२ जनाको मृत्यु भएको छ भने ६ जना अझै बेपत्ता छन् । जिल्लाभर १ सयभन्दा बढी घर क्षतिग्रस्त भएका छन् । ५ सय घरहरुमा आशिंक क्षति पुगेको छ ।

बडोलतोला, बलेढुंगा, घट्टेगडा, लहरेला, चोक्टेबगर, तामाकोट, पुछुडेबाडा, सेराचौर, औल, बड्डाला, गैरा, पुच्छेगाउ, ओखलढुंगा, डाडागाउँ, बाइती, सिम र बाखरकोट, फडेराडा, राताखाल, कुमालवाडा बस्तीका बासिन्दालाई जोखिमबाट बचाउन विद्यालय र चउरमा राखिएको नगरले जनाएको छ । पहिरोमा हराएकालाई ५ दिनसम्म प्रहरीले खोजे पनि भेटाउन सकेको छैन । बाढीपहिरोले कर्णाली करिडोरको फुगाडमा हालिएको बेलिब्रिज क्षतिग्रस्त छ । गाउँ पुग्ने सडक पनि सबै अवरुद्ध छन् ।

तपाईको प्रतिक्रिया

सम्बन्धित समाचार