294 पटक हेरिएको
ईलाम : कोशी प्रदेशका १२ स्थानीय तहका प्राविधिक जनशक्तिका लागि आयोजना गरिएको तीन दिने वास (खानेपानी, सरसफाइ तथा स्वच्छता) योजना तयारी सम्बन्धी तालिम ईलाममा सम्पन्न भएको छ।
कोशी प्रदेश खानेपानी, सिँचाइ तथा ऊर्जा मन्त्रालय, खानेपानी तथा ढल व्यवस्थापन विभाग, एसएनभी नेपाल तथा सम्बन्धित स्थानीय तहहरूको सहकार्यमा सञ्चालन गरिएको उक्त तालिम चैत १० देखि १२ गतेसम्म सञ्चालन भएको थियो।
तालिममा सागुरीगढी, सभापोखरी, बुढिगंगा, मिकलाजुङ, फाकोकथुम, चुलाचुली, ग्रामथान, छथर, ताप्ली, लिमचुङबुङ, हरिनगर र चिचिला गाउँपालिकाका प्राविधिक गणक, वास फोकल व्यक्ति तथा सूचना प्रविधि अधिकृतहरूको सहभागिता रहेको थियो।
तालिम अन्तर्गत राष्ट्रिय वास व्यवस्थापन सूचना प्रणालीमार्फत खानेपानी योजनाको सूचीकरण, सेवा नपुगेका घरधुरी पहिचान, सामुदायिक सरसफाइ तथा दिगोपनसम्बन्धी अनुप्रयोगहरूको प्रयोग, स्थापना र अभ्यास गराइएको थियो। सहभागीहरूले डिजिटल माध्यमबाट तथ्याङ्क सङ्कलन, डेटा प्रविष्टि, सेवा स्तर मूल्याङ्कन, सूचकांक गणना, डेटा गुणस्तर परीक्षण तथा योजना प्राथमिकिकरण सम्बन्धी व्यवहारिक ज्ञान र सीप हासिल गरेका छन्।
तालिमका प्रदेश स्रोत व्यक्ति मिलन चौधरीका अनुसार वास योजना तयारी प्रक्रियालाई गुणस्तरीय, सहभागितामूलक र प्रमाणमा आधारित बनाउनु तालिमको मुख्य उद्देश्य रहेको थियो। उहाँले डिजिटल प्रणालीमार्फत योजना निर्माण प्रक्रियालाई रूपान्तरण गर्ने लक्ष्य राखिएको जानकारी दिनुभयो।
पहिलो दिन खानेपानी प्रणालीको आधारभूत अवधारणा, पानीका स्रोतका प्रकार, ग्राभिटी तथा लिफ्ट प्रणाली, पाइपलाइन संरचना, जल गुणस्तर मापदण्ड, सेवा स्तर तथा जलवायु परिवर्तन र विपद्का प्रभावबारे प्रस्तुति र समूहकार्य गरिएको थियो।
दोस्रो दिन राष्ट्रिय वास व्यवस्थापन सूचना प्रणालीसम्बन्धी विस्तृत जानकारीसहित डेमो अभ्यास र डिजिटल विवरण सङ्कलन गराइएको थियो। साथै सहभागीहरूले वास्तविक खानेपानी आयोजनाको स्थलगत अवलोकन गरी तथ्याङ्क सङ्कलन अभ्याससमेत गरेका थिए।
तेस्रो दिन फिल्ड अनुभव आदानप्रदान, डेटा अपलोड तथा गुणस्तर परीक्षण, त्रुटि पहिचान र सुधार, कार्ययोजना निर्माण तथा जिम्मेवारी बाँडफाँट गरिएको थियो।
तालिमको प्रारम्भ र अन्त्यमा पूर्व तथा पश्चात् परीक्षण मार्फत सहभागीहरूको सिकाइ उपलब्धिको मूल्याङ्कन गरिएको थियो। तालिम सहजीकरण मिलन चौधरी, ललित खतिवडा, प्रविण तिवारी, इन्द्र चापागाई, रेवती नेपाल र गोविन्द कार्कीले गर्नुभएको थियो।
समापन सत्रमा सहभागीहरूले डिजिटल प्रणालीमार्फत तयार गरिने वास योजना स्थानीय तहमा सुरक्षित खानेपानी सेवा विस्तार, सुधारिएको सरसफाइ अवस्था तथा समग्र स्वच्छता व्यवस्थापन सुदृढीकरणका लागि महत्वपूर्ण आधार बन्ने विश्वास व्यक्त गरेका छन्।
कार्यक्रमले स्थानीय तहमा तथ्यमा आधारित योजना निर्माण, सेवा स्तर अभिवृद्धि तथा दीगो खानेपानी र सरसफाइ व्यवस्थापन प्रवर्द्धनमा दीर्घकालीन सकारात्मक प्रभाव पार्ने अपेक्षा गरिएको छ।
