92 पटक हेरिएको 
सुर्खेत : कर्णाली प्रदेशको जलस्रोत तथा ऊर्जा विकास मन्त्रालयले आर्थिक वर्ष २०८२/०८३ को तेस्रो त्रैमासिक प्रगति समीक्षा कार्यक्रम औपचारिक रूपमा सुरु गरेको छ।
प्रदेशस्तरमा सञ्चालनमा रहेका जलस्रोत तथा ऊर्जा सम्बन्धी योजनाहरूको प्रगति, प्रभावकारिता र चुनौतीहरूको समग्र मूल्यांकन गर्ने उद्देश्यले कार्यक्रम आयोजना गरिएको मन्त्रालयले जनाएको छ।कार्यक्रममा जलस्रोत तथा ऊर्जा विकास मन्त्री बिजया बुढा को प्रमुख आतिथ्यता रहेको थियो भने मन्त्रालयका प्रदेश सचिव डा. योगेन्द्र मिश्र को अध्यक्षतामा कार्यक्रम सञ्चालन भएको हो। कार्यक्रममा कर्णाली प्रदेश योजना आयोग का सदस्य डम्बर बहादुर रावत, आर्थिक मामिला तथा योजना मन्त्रालय का प्रतिनिधिहरू, साथै मन्त्रालय मातहतका विभिन्न जिल्लाका कार्यालय प्रमुखहरूको उल्लेखनीय सहभागिता रहेको छ।
समीक्षा कार्यक्रममा जिल्लागत रूपमा कार्यालय प्रमुखहरूले चालु आर्थिक वर्षमा सम्पन्न भएका आयोजना, भौतिक तथा वित्तीय प्रगति, सेवा प्रवाहको अवस्था, तथा कार्यान्वयनका क्रममा भोगिएका चुनौतीहरूबारे विस्तृत प्रतिवेदन प्रस्तुत गरिरहेका छन्। प्रस्तुत प्रतिवेदनहरू माथि सहभागीहरूबीच गहन छलफल भइरहेको छ, जसले कार्यसम्पादनमा सुधार ल्याउने सम्भावित उपायहरू पहिचान गर्न मद्दत पुग्ने अपेक्षा गरिएको छ।
यसैबीच, आगामी आर्थिक वर्ष २०८३/०८४ का लागि बजेट तथा कार्यक्रम तर्जुमा प्रक्रियाबारे पनि कार्यक्रममा प्रारम्भिक छलफल सुरु गरिएको छ। विकास प्राथमिकता निर्धारण, स्रोतको प्रभावकारी उपयोग, र प्रदेशको दीगो ऊर्जा तथा जलस्रोत व्यवस्थापनमा केन्द्रित रणनीति निर्माणका विषयमा सरोकारवालाबीच सुझाव आदानप्रदान भइरहेको मन्त्रालयले जनाएको छ।
मन्त्रालयले यस प्रकारको नियमित समीक्षा कार्यक्रमले पारदर्शिता, उत्तरदायित्व र परिणाममुखी कार्यसम्पादनलाई सुदृढ बनाउने विश्वास व्यक्त गरेको छ।
