197 पटक हेरिएको 
काठमाडौँ । सरकारले एकीकृत खानेपानी तथा ढल व्यवस्थापन (क्षेत्र) आयोजनाका लागि एसियाली विकास बैंक (एडीबी) बाट प्राप्त हुने करिब ११५ मिलियन अमेरिकी डलर बराबरको सहुलियतपूर्ण ऋण सम्बन्धी सम्झौता प्रक्रिया अघि बढाउने निर्णय गरेको छ।
मन्त्रिपरिषद्को बिहीबार सिंहदरबारमा बसेको बैठकले यस सम्बन्धी वित्तीय सम्झौता तथा आवश्यक कागजातलाई अन्तिम रूप दिन अर्थ मन्त्रालयका सहसचिवको नेतृत्वमा वार्ता टोली गठन गर्ने निर्णय गरेको हो।
सरकारको निर्णय अनुसार गठित वार्ता टोलीले एडीबीसँग हुने ऋण सम्झौताका आर्थिक, प्राविधिक तथा प्रशासनिक पक्षमा विस्तृत छलफल गर्नेछ। टोलीले ऋणका शर्त, कार्यान्वयनको समयसीमा, परियोजना व्यवस्थापन संरचना, खर्च विनियोजन तथा अनुगमन प्रणाली लगायतका विषयलाई अन्तिम टुंगो लगाउने जिम्मेवारी पाउनेछ।
यो ऋण सहायता एकीकृत खानेपानी तथा ढल व्यवस्थापन (क्षेत्र) आयोजना कार्यान्वयनका लागि उपयोग गरिने बताइएको छ। परियोजना मार्फत शहरी तथा अर्धशहरी क्षेत्रमा सुरक्षित खानेपानी आपूर्ति विस्तार गर्नुका साथै ढल संकलन, प्रशोधन तथा व्यवस्थापन प्रणालीलाई सुदृढ बनाउने लक्ष्य लिइएको छ।
सरकारले यो आयोजना देशका विभिन्न क्षेत्रमा बढ्दो शहरीकरणसँगै देखिएको खानेपानी अभाव, असुरक्षित ढल व्यवस्थापन र सरसफाइ सम्बन्धी चुनौती समाधान गर्न महत्वपूर्ण हुने अपेक्षा गरेको छ। यसबाट सुरक्षित पानीमा पहुँच वृद्धि हुनुका साथै सार्वजनिक स्वास्थ्य र वातावरणीय सरसफाइमा समेत सकारात्मक प्रभाव पर्ने विश्वास गरिएको छ।
