174 पटक हेरिएको 
पर्वत : समुद्री सतहदेखि तीन हजार तीन सय मिटरको उचाइमा रहेको पर्वतको प्रसिद्ध धार्मिक एवं पर्यटकीयस्थल हम्पाल लेकमा आधुनिक शौचालय निर्माण गरिएको छ । हम्पाल क्षेत्रमा आउने आन्तरिक तथा बाह्य पर्यटकको सुविधाका लागि शौचालय निर्माण गरिएको हो ।
उनका अनुसार मोदी गाउँपालिकाको आर्थिक सहयोगमा सात लाख रुपैयाँको लागतमा महिला, पुरुषका लागि छुट्टाछुट्टै शौचालय र स्नानघर निर्माण गरिएको पुनले बताए । पुनले आफैं अध्यक्ष भएर स्थानीय कामदारहरुमार्फत निर्माण गरेको जानकारी दिए । यसअघि सोही ठाउँमा विश्रामस्थल निर्माण र गत वर्ष जलजला गाउँपालिका र मोदी गाउँपालिकाको संयुक्त लगानीमा विद्युतीकरण गरिएको थियो ।
जलजला र हम्प्पालको भूभागलाई विभिन्न क्षेत्रसँग जोड्ने व्यवस्थित पदमार्ग, सडक मार्ग र होटल तथा विश्रामस्थलजस्ता पूर्वाधार बनेपछि सिजन सुरु हुनेबित्तिकै पर्यटक संख्या बढेको हो । गण्डकी प्रदेश सरकारको पटकपटक गरी ६० लाख रुपैयाँ बजेटमा पर्वतको मोदी गाउँपालिका–२ देउपुरदेखि १६ किलोमिटर लामो ढुंगाको सिँढीसहितको पदमार्ग निर्माण गरिएको छ ।
यसैगरी जलजला–६ शालिजादेखि जलजलासम्म सडकमार्गको पहुँच विस्तार भएपछि सडक र पदमार्ग दुवै प्रयोग गरेर यहाँ पुग्ने पर्यटक बढेका हुन् । हम्पालमा होटल व्यावसाय सञ्चालन गर्दै आएका टिका पुनले होटलमा अग्रिम बुकिङ गरेर आउनेहरू बढ्दै गएका छन् । यतिबेला यहाँ १२ थरीका लालीगुँरास फुलिरहेका छन् ।
यहाँ घुम्न, तस्बिर खिच्न, टिकटक बनाउन र विभिन्न गीतहरुको छायांकन गर्न आउनेहरू समेत उल्लेख्य मात्रामा बढेको उनको भनाइ छ । यो पदमार्गलाई अन्नपूर्ण चक्रीय पदमार्गका रूपमा समेत बाह्य पर्यटकले प्रयोग गर्दै आएका छन् । अन्नपूर्ण पदमार्गअन्तर्गत कास्कीको नयाँपुलदेखि घान्द्रुक र तिखेढुंगासम्म सडक विस्तार भएपछि बाह्य पर्यटक यो पदमार्गमा हिँड्न थालेको पर्यटन व्यावसायी मनबहादुर खड्काले बताए ।
चालु आर्थिक वर्षमा प्रदेश सरकारले विनियोजन गरेको थप २० लाख रुपैयाँ बजेटबाट जलजलाबाट म्याग्दीको मोहरेडाँडातर्फ पदमार्ग निर्माण गरिने उनको भनाइ छ । हिन्दू धार्मिकग्रन्थ रामायणमा कालञ्जर पर्वतका रूपमा व्याख्या गरिएको हम्पाल विभिन्न जडीबुटीले भरिपूर्ण जैविक विविधतायुक्त स्थल हो । यो खबर कारोबार दैनिकबाट साभार गरिएको हो।
हम्पालमा धार्मिक पूर्वाधार र प्रवर्धनका गतिविधि सञ्चालन गरिएका छन् भने पहाडका बीचमा रहेको सीम क्षेत्रमा बाँध थुनेर कृत्रिम तलाउ बनाउने योजना पनि अघि सारिएको छ ।
