फोहर बिक्रीबाट व्यास नगरपालिकाले साढे चार महिनामै कमायो ९ लाख ४० हजार रुपैयाँ

दैनिक ११ टन फोहर व्यवस्थापन; कुहिने फोहरबाट बायोग्यास उत्पादन

  वास खबर समाचारदाता  98 पटक हेरिएको
🔗
67
Shares

तनहुँ : फोहरमैला व्यवस्थापनलाई आम्दानीको स्रोतका रूपमा समेत उपयोग गर्न थालेको तनहुँको व्यास नगरपालिकाले चालु आर्थिक वर्षको साउनदेखि कात्तिक १९ गतेसम्म बिक्रीयोग्य फोहर बेचेर ९ लाख ४० हजार ४९४ रुपैयाँ आम्दानी गरेको छ ।

नगरपालिकाले घर तथा बजार क्षेत्रबाट सङ्कलन हुने कागज, कार्टुन, फलाम, प्लास्टिक र सिसाजन्य सामग्री वर्गीकरण गरी बिक्री गर्दै आएको छ । यसरी बिक्री गरिएका पुनः प्रयोग तथा पुनः प्रशोधन गर्न सकिने सामग्रीबाट नगरपालिकाको आन्तरिक आम्दानी समेत बढेको प्रमुख प्रशासकीय अधिकृत सुकदेव लम्सालले जानकारी दिनुभयो ।

नगरपालिकाले गत आर्थिक वर्ष २०८२/८३ मा फोहर बिक्रीबाट २७ लाख रुपैयाँ आम्दानी गरेको थियो । बिक्री योग्य फोहरको व्यवस्थित सङ्कलन र बिक्री प्रक्रियालाई निरन्तरता दिँदै आएको नगरपालिकाले आर्थिक वर्ष २०८१/८२ मा बोलपत्र आह्वान गरी फोहर बिक्रीको व्यवस्था मिलाएको थियो ।

सोही अनुसार अघिल्लो आर्थिक वर्षको मूल्यमा १० प्रतिशत थप गरी व्यास नगरपालिका–१ स्थित तनहुँ स्क्रेप सेन्टरलाई बिक्रीयोग्य फोहर खरिद तथा व्यवस्थापनको जिम्मेवारी दिइएको थियो ।

प्रमुख प्रशासकीय अधिकृत लम्सालका अनुसार घर-घरबाटै कुहिने र नकुहिने फोहर छुट्याएर सङ्कलन गर्न थालेपछि फोहर व्यवस्थापनमा सहजता आएको छ । नगरपालिकाले दुवै प्रकारका फोहर छुट्टाछुट्टै सवारी साधन प्रयोग गरी सङ्कलन गर्दै आएको छ ।

फोहरलाई स्रोतबाटै वर्गीकरण गर्ने अभ्यासलाई प्रभावकारी बनाउन नगरपालिकाले विभिन्न टोल, वडा र विद्यालयमा पुगेर सचेतनामूलक कार्यक्रम समेत सञ्चालन गर्दै आएको छ । नगरपालिकाको कार्यालय परिसरमा सङ्कलित नकुहिने फोहरबाट कागज, सिसा, प्लास्टिक लगायत सामग्री छुट्याएर बिक्री गर्ने गरिएको छ ।

कुहिने फोहरबाट बायोग्यास उत्पादन

व्यास नगरपालिकाले कुहिने फोहरलाई पनि उपयोगी स्रोतका रूपमा व्यवस्थापन गर्दै आएको छ । घर तथा बजारबाट सङ्कलन गरिएको कुहिने फोहर दुम्सीस्थित गौ संरक्षण केन्द्रमा पुर्‍याएर व्यवस्थापन गर्ने गरिएको छ ।

उक्त फोहर बायोग्यास उत्पादनमा प्रयोग हुँदै आएको नगरपालिकाले जनाएको छ ।

यसले फोहरको मात्रा घटाउनुका साथै जैविक फोहरलाई ऊर्जा उत्पादनमा उपयोग गर्ने अवसर समेत सिर्जना गरेको छ । त्यस्तै, नकुहिने फोहर बिक्री गर्दा पुनः प्रयोग तथा पुनः प्रशोधनको सम्भावना बढेको छ ।

नगरपालिकाका अनुसार बजार क्षेत्रका वडा नं. २, ३ र ४ बाट दैनिक करिब ११ टन फोहर सङ्कलन हुने गरेको छ । सङ्कलित फोहरलाई प्रकृति अनुसार छुट्याएर व्यवस्थापन गर्ने गरिएको छ ।

दीर्घकालीन फोहर व्यवस्थापनका लागि जग्गाको खोजी

फोहर वर्गीकरण, पुनः प्रयोगयोग्य सामग्रीको बिक्री र जैविक फोहरको उपयोगमा काम गरिरहेको नगरपालिकालाई दीर्घकालीन फोहरमैला व्यवस्थापनका लागि भने उपयुक्त स्थानको अभाव छ ।

नगर प्रमुख वैकुण्ठ न्यौपानेका अनुसार व्यास नगरपालिका–१३ मा सरसफाइ व्यवस्थापनका लागि आवश्यक जग्गा खरिद गर्ने प्रक्रिया पूरा गरी सम्बन्धित मन्त्रालयमा सिफारिस गरिएको छ । तर, मन्त्रालयबाट निर्णय हुन नसक्दा दीर्घकालीन फोहरमैला व्यवस्थापनको योजना अघि बढाउन समस्या भइरहेको उहाँले बताउनुभयो ।

नगरपालिकाले फोहरलाई समस्याका रूपमा मात्र नहेरी पुनः प्रयोग, पुनः प्रशोधन र ऊर्जा उत्पादनसँग जोड्ने प्रयास गरिरहेको छ ।

स्रोतबाटै फोहर वर्गीकरण, बिक्रीयोग्य सामग्रीको पुनः उपयोग र जैविक फोहरबाट बायोग्यास उत्पादनजस्ता अभ्यासले नगरको सरसफाइ व्यवस्थापनलाई थप व्यवस्थित बनाउन सहयोग पुर्‍याउने अपेक्षा गरिएको छ ।


तपाईको प्रतिक्रिया

सम्बन्धित समाचार